Кьуьд

Автор: Намик Фарзалиев


Ци кьуьд хьанач мишекъат-

Аватна жив метехъди.

Ахваралла тебиат,

Атанва хиб,кьетендик.



Валар-кулар,живеди

Илисна-элкъвей патай,

Кьунва вичив,кlевидик,

Ракьари,гъуьрч хьиз-гьатай.



Тарарни,а зурбабур,

Килига на,хилериз.

Гьинва хьайи такабур-

Икрамзава чилериз?



Агъвазмани,заиф гар,

Саврух жезва,вижевай.

Кьецlил жезва мад тарар-

Азад хьана,живедкай.



Агаж хьанва нуькlерни-

Четин тир кьван,хъуьтуьн кар.

Амач чара емерни-

Незва тlакьай кицикар.



Мегъуьн тарцин кьачlунал,

Гъвечlи цуцlул экъвезва.

Вилер алаз-зи чинал,

Сарарив мегъв регъвезва.



Горизонтдай,яру рагъ-

Лугьуну жеч рагъ,адаз.

Хъуьрез ава,яргъалай,

Саки ава-рахшандаз:



-Куьн тирни,гад хьайила,

"Вучда икьван чимеркай,"-

Лугьудайбур?Ма гила!

Дадар къачу мекьеркай!



...Са зун ава гъавурда,

Хуьтягь жеда мекьер,мад.

Ракъу мад жив цlурурда-

Хкида чаз мадни гад.



29.10.16