Цi так?

Автор: Лаззаро


Ён вечна турбуе пытаннем: "Ты як?"

"Ты як?"—

і чакае адказу...

Хоць знае, "тыяка",

(адзначаны факт!):

ніхто і ніколі

ні разу



яму не паскардзіўся ў горы-бядзе,

і ў шчасці не выказаў "радо"...



А ён усё роўна свой допыт вядзе.

І ўвесну, і ў час лістападу,

і ўзімку, і летам,

і ноччу, і днём

прыглядвае і наглядае:

"Ты як?"—

улезае між явай і сном.

"Ты як?"—

бы святар спавядае.



І маецца,

маецца,

маятны дух,

і кружыць

абапал,

і кружыць...



І гэты няспынны

размераны рух

чаруе і ўзрушвае душы.



Ты — як?

А і праўда, падумаць бы, — як?"

Ці так мы жывём, як належыць?"



"Ці так?" —

адгукаецца думкам,

"Ці так?" —



старэнькі

гадзіннік

на вежы...