Ах йиз бай

Автор: Гюльмагомед Расулов


Йишвну вари сикин духьна, даахна жакьвар.

Ригъра магьа даабхна, нивкIу а сивар.

Яв бицIи хядарсдар, алахьну улар,

Ширин нивкIуз гъарах жан, мишана йиз бай.



Гъишну кIури дадин бахт бихъурайин?

Ккунир кьяляхъ дуфну, хабаъ архьрайин?

Яраб, кIваъ зат удрушру дерд дадайин,

Тахсир дарди ургурайир сар вуйин?



Даабхну а юкIв ккунирин, нивкIуъ а йиз бахт.

Аьлхъюрайибси нивкI’ан, аьлхъюра кьисмат.

Мутувана кIваз хажалат, апIурза миннат,

Ширин нивкIуз гъарах жан, мишана йиз бай.



Гъишну кIури бахт узуз бихъурайин?

КIури «алдабгъ хил», хабаъ йиз архьрайин?

Уьмрин жигьил вахт кьяляхъ дарш гъюрайин?

Тувнайиб Аллагьди гьамциб, вушул пай.